सादिक खाटीक यांना महामंडळावर संधी द्या .
सुमित्र माडगूळकर यांची शरद पवारांकडे मागणी .
________________________
पुणे दि. २७ (प्रतिनिधी )
सांगली जिल्ह्यातील आटपाडीचे सर्वस्पर्शी, सर्वप्रिय व्यक्तीमत्व सादिक पापामियाँ खाटीक यांना महामंडळावर संधी द्या, अशी मागणी ग . दि . माडगुळकर – व्यंकटेश माडगुळकर यांचे नातू सुमित्र श्रीधर माडगूळकर पुणे यांनी राष्ट्रीय नेते खासदार शरद पवार यांच्याकडे ईमेलद्वारे केली आहे .
राज्याचे उपमुख्यमंत्री अजितदादा पवार, जलसंपदा मंत्री, राष्ट्रवादीचे प्रदेशाध्यक्ष जयंतराव पाटील, खासदार सुप्रियाताई सुळे यांना ही याबाबतचा ईमेल पाठविण्यात आला आहे .
माणदेशी आटपाडीचे चतुरस्त्र ,अष्टपैलू पत्रकार, कला, क्रीडा, सांस्कृतीक, साहित्य इत्यादी अनेक क्षेत्रात ३८ वर्षापासून कार्यरत असणारे व्यक्तीमत्व म्हणजे सादिक पापामियाँ खाटीक हे होत .असे स्पष्ट करून सुमित्र माडगूळकर यांनी , सादिक खाटीक यांनी ३२ वर्षे गाजविलेली पत्रकारीता, पत्रकारीतेतील अनेक राज्यस्तरीय पुरस्कार, माणपत्राने झालेला त्यांचा गौरव, आकाशवाणी सांगली वरून सादर केलेली असंख्य विकासपत्रे, त्यांच्या वाढदिवसाच्या औचित्याने , एबीपी माझा मराठी न्युज चॅनेल मुंबईचे संपादक राजीव खांडेकर, ग्राहक संरक्षण न्यायालयाचे माजी न्यायाधीश ॲड.एम.डी .देशमुख , अखिल भारतीय मराठी पत्रकार परिषदेचे प्रदेश उपाध्यक्ष, दै . तरुण भारत बेळगांव – सांगलीचे सहसंपादक श्री . शिवराज काटकर, दिवंगत माजी आमदार ॲड. जयंत सोहनी, माजी प्राचार्य डॉ . श्रीपाद जोशी, शिक्षक नेत्या डॉ . स्वाती शिंदे – पवार इत्यादी राज्यातील १६ मान्यवरांनी खास लेख प्रसिद्ध करून सादिक खाटीक यांचा मुक्त कंठाने केलेला गौरव सादिक खाटीक यांच्या जिंदादिल व्यक्तीमत्वाची साक्ष देतो . असे या ईमेल मध्ये म्हटले आहे .
सुमित्र माडगूळकर आपल्या ईमेल मध्ये पुढे म्हणतात, माडगूळकर परिवार, शंकरराव खरात, ना .सं. इनामदार ,बॅरिस्टर आप्पासाहेब पंत वगैरे माणदेशीवर जीवापाड प्रेम करणाऱ्या सादिक खाटीक यांनी साहित्य संमेलने, कवी संमेलने ,व्याख्यानमाला, कथाकथन स्पर्धा, जयंती, पुण्यतिथी च्या निमित्ताने विविध उपक्रमातून या साहित्यीक रत्नांचा सतत जागर केला आहे . थोर साहित्यीक रा . चिं .ढेरे यांच्या “शिखर शिंगणापूरचा शंभू महादेव “. या संदर्भ ग्रंथात सादिक खाटीक यांच्या लिखाणाचा अनेक ठिकाणी आलेला संदर्भ, शिवसेनेचे राष्ट्रीय प्रवक्ते, दैनिक सामनाचे कार्यकारी संपादक , खासदार संजय राऊत यांच्यासह राज्यातील अनेक मान्यवर महोदयांकडून घेतली जाणारी ह्दयस्पर्शी दखल हीच या गरीबाची ( सादिक खाटीक ) आयुष्याची कमाई आहे . गत ४० वर्षापासून गंजलेल्या ,गळक्या पत्र्यात राहणाऱ्या सादिक खाटीक आणि त्यांच्या परिवाराने आज अखेर स्वाभीमानाने जीवन कंठले आहे .
एस .टी . महामंडळ, पर्यटन महामंडळ, कृष्णा खोरे महामंडळ, वीज महामंडळ वगैरे पैकी कोणत्याही शक्तीशाली महामंडळावर सादिक खाटीक यांना संधी दिल्यास, उपेक्षित आटपाडी तालुक्याचा आणि माणदेशाचा गौरव होवू शकतो. काही गावांचा अपवाद वगळल्यास संपूर्ण भारतभर सर्व गावात आढळणाऱ्या सर्व धर्मीय खाटीक बांधवांचा गौरव होवू शकतो . मुस्लीम,ख्रिश्चन, जैन, पारशी, बौद्ध, शीख ,ज्यू या अल्पसंख्याक समाजा बरोबर राज्यातील ओबीसी, अलुतेदार – बलुतेदार घटकांसह अंध, अंपग, युवक, माता भगिनी बहुजन वर्गास मोठा आनंद होवू शकतो . शेतीच्या पाण्यासाठी सतत लिखाण, भाषणे, आंदोलनाच्या माध्यमातून शेतकरी कष्टकरी वर्गास न्याय मिळवून देण्यात आयूष्य खर्ची घातल्याने शेतकरी कष्टकरी वर्गासही सादिक खाटीक यांच्या रूपाने न्याय मिळू शकतो . साहित्य,कला, क्रीडा, सांस्कृतीक क्षेत्रात ही त्यांच्या निवडीने अत्यानंद होवू शकतो . या सर्व गोष्टींचा विचार करून सादिक खाटीक यांच्या रूपाने आटपाडी तालुक्याचा गौरव करावा . अशीही विनंती या ईमेल द्वारे सुमित्र माडगुळकर यांनी शेवटी केली आहे .
