दहिवडी ता.25/07/2022: वरिष्ठ भूवैज्ञानिक, भूजल सर्वेक्षण आणि विकास यंत्रणा (GSDA) कार्यालयाकडून अटल भूजल योजनेंतर्गत सातारा जिल्ह्यातील माण खटाव व वाई तालुक्यातील एकूण 115 गावांमध्ये अटल भूजल योजना राबविण्यात येत आहे. या योजनेंतर्गत विविध विभागाच्या सहकार्याने जलसंधारणाच्या उपाय योजना राबविण्यात येत असून लोकसहभागाद्वारे समाजाच्या पाणी बचतीच्या वर्तनात सकारात्मक बदल घडवून आणण्यासाठी देखिल भूजल सर्वेक्षण आणि विकास यंत्रणा सातारा काम करत आहे.
याअनुषंगानेच माहिती व प्रसारण मंत्रालय भारत सरकार यांच्या केंद्रीय संचार ब्युरो अंतर्गत राज्यात अटल भूजल योजनेंतर्गत लोककलेद्वारे जनजागृती अभियान २०२२ राबविण्यात येत आहे. या अनुषंगाने शाहीर श्रीरंग डी रणदिवे कलापथक यांच्या कलासमुहाद्वारे मलवडी ता.माण येथे जनजागृती विषयक कलापथक सादरीकरणाचा कार्यक्रम घेण्यात आला. कलापथक मनोरंजनाच्या माध्यमातून ग्रामस्थांना भूजल बचतीचे महत्व व त्यावरील उपाय योजना बाबत मार्गदर्शन करण्यात आले तसेच ग्रामपंचायतीच्या जलसुरक्षा आराखड्यातील विविध विभागाच्या योजनांच्या अभिसरणातून होणारी जलसंधारणाची विविध कामे, शेतकरी बांधवांसाठी कमी पाण्यातील पिक पद्धती, ठिबक व तुषार सिंचनाचा वापर करणेबाबत माहिती देण्यात आली. सदर कार्यक्रमाला गावकऱ्यांचा चांगला प्रतिसाद मिळाला. सदर कार्यक्रम सरपंच यांच्या अध्यक्षतेखाली घेण्यात आला असून सदर कार्यक्रमाला आज मलवडी गावामधे कलापथकाच्या कार्यक्रमाला जास्तीत जास्त गावकरी उपस्थित होते.
कार्यक्रमाच्या यशस्वितेसाठी उपसरपंच, ग्रामपंचायत सदस्य, ग्राम आरोग्य पोषण पाणीपुरवठा व स्वच्छता समितीचे सदस्य, युवक मंडळ व तसेच जिल्हा अंमलबजावणी भागिदार संस्थाचे माण तालुका समन्वयक वैभव सोनवणे तसेच स्थानिक समन्वयक सुलेमान मुलांनी दीपक पवार यांनी प्रयत्न केले.
