चांडाळ चौकडीच्या कलाकारांनी दहिवडी काॅलेजच्या विद्यार्थ्यांना खळखळुन हसवले
चांडाळ चौकडीच्या करामतीफेम बाळासाहेब, रामभाऊ अन सुभाषराव यांची उपस्थिती
दहिवडी : ता.२०
दहिवडी कॉलेज दहिवडीमध्ये ज्युनियर विभागाच्या युवा महोत्सवाचा समारोप मोठ्या जल्लोषात संपन्न झाला.या समारोप सोहळ्याचे मुख्य आकर्षण म्हणजे महाराष्ट्रातील सर्वात जास्त गाजलेल्या चांडाळ चौकडीच्या करामतीफेम बाळासाहेब अर्थात भरत शिंदे,रामदास जगताप (रामभाऊ) आणि सुभाष मदने(सुभाषराव) यांची प्रमुख उपस्थिती होती.
समारोपप्रसंगी बोलताना भरत शिंदे म्हणाले की,विद्यार्थी जीवनात जगताना सर्वांनी आपल्या आईबापाच्या कष्टाची जाण ठेवून शिकायला पाहिजे. त्याचबरोबर कलाक्षेत्रासह अभ्यासाकडेही विद्यार्थ्यांनी लक्ष दिले पाहिजे, तरच जीवनात यशस्वी होता येईल. हे सर्व सांगतानाच भरत शिंदे यांनी केलेली ‘….कसय बघा लावतू एकेकाचा कार्यक्रम’ ही डायलॉगबाजी विद्यार्थ्यांना खळाळून हसवून गेली.
याचबरोबर सुभाष मदने(सुभाषराव) यांनी आपले अनुभव सांगताना कोणत्याही क्षेत्रात यशस्वी व्हायचे असेल तर जिद्द आणि अपार मेहनत असावी लागते,असे सांगितले.रामदास जगताप(रामभाऊ) यांच्या सर्वफेमस अशा ‘….राहिलेली सगळीच फुकीन पण नादच पुरा करीन’ या डायलॉगने विद्यार्थ्यांचा प्रचंड प्रतिसाद मिळवला.
गेले तीन दिवस चाललेल्या युवा महोत्सवाच्या समारोप प्रसंगी या गाजलेल्या कलाकारांच्या उपस्थितीमुळे दहिवडी कॉलेजचे सांस्कृतिक सभागृह विद्यार्थ्यानी खचाखच भरले होते. या तीन दिवस चाललेल्या युवा महोत्सवात गायन,वाद्यवृंद,एकपात्री प्रयोग, लोकनृत्य,इत्यादी प्रकारांत विद्यार्थ्यांनी सहभाग नोंदवला. यामध्ये प्रत्येक कलाप्रकारात पहिले तीन व एक उत्तेजनार्थ अशा स्वरूपाची बक्षिसेदेखील देण्यात आली.
कार्यक्रमाच्या अध्यक्षस्थानी दहिवडी कॉलेजचे प्राचार्य डॉ.सुरेश साळुंखे होते तर प्रमुख उपस्थिती म्हणून उपप्राचार्या डॉ.नंदिनी साळुंखे,नगरसेवक महेश जाधव,सीडीसी सदस्य अजित पवार,रावसाहेब देशमुख,बापूसाहेब मिसाळ,रुपेश कदम,एकनाथ वाघमोडे ,किरण खाडे,धिरेनकुमार भोसले इत्यादी मान्यवरांसह दहिवडी पोलिस स्टेशनच्या निर्भया पथकाचे तानाजी चंदनशिवे,नितीन सजगणे यांची प्रमुख उपस्थिती होती.
प्रास्ताविक व आभारप्रदर्शन युवा महोत्सव कमिटी प्रमुख राऊत एस.एच.यांनी केले तर सूत्रसंचालन शेळके आर आर यांनी केले.
छायाचित्र :
युवा महोत्सवात कलाप्रकार सादर करताना दहिवडी कॉलेज ज्युनियर विभागाच्या विद्यार्थीनी….
(छाया : धिरेनकुमार भोसले)
