लव्हु मिसाळ यांनी एक एकरात वांग्याच्या पिकातून कमावले साडेतीन लाख
वरकुटे – मलवडी / वार्ताहर
अलीकडे निसर्गाचा लहरीपणावर शेतीचे गणित अवलंबून राहू लागले आहे. शेतकऱ्यांना शेती करताना अनेक अडचणीचा सामना करावा लागत आहे. कधी दुष्काळ , कधी अवकाळी पाऊस , कधी अतिवृष्टी , कधी बाजारातील मंदी तर कधी वाढता उत्पादन खर्च आदी कारणांमुळे शेतकरी मेटाकुटीला आला आहे. त्याला शेतीतील उत्पादन खर्च निघत नाही. असे असतानाच वरकुटे – मलवडी ता. माण येथील शेतकरी लव्हु रखमाजी मिसाळ यांनी वांगी पिकाबरोबर मिरची हे दुहेरी पीक घेऊन कमी उत्पादन खर्चात जादा उत्पादन घेण्याचा प्रयत्न केला असून त्यांच्या या प्रयत्नाला यश येत आहे.
लव्हु मिसाळ यांनी एक एकरात मुख्य पीक म्हणून वांंग्याचे घेतले असून अंतर्गत पीक मिरचीचे पीक घेतले आहे. त्यांनी चार फुटी सरीत वांग्याच्या चार हजार रोपांची लागण केली . त्याच पीकात सुमारे तीन ते साडेतीन हजार मिरचीच्या रोपांची लागवड केली. पाणी देण्यासाठी ठिंबक सिंचनाचा वापर केला आहे. मिसाळ यांच्या वांगी पिकांचे तीन ते चार तोडे झाले असून सध्या त्यांना आटपाडी व म्हसवड बाजारात झालेल्या लिलावात वांगी तब्बल ११० रुपये किलो दराने विक्रेत्यांनी खरेदी केले. १५ किलोच्या कँरेटला तब्बल १६५० रुपयांची बोली लागली. आतापर्यंत त्यांना तीन लाख रूपये मिळाले आहेत. दिवसेंदिवस वांग्याला चांगला भर येत असून आतापर्यंत चौथ्या व पाचव्या तोड्याला अडीच ते पावणे तीन टन वांगी मिळाली आहेत. मुंबई बाजार पेठेत हाच दर दहा किलो ला १५०० ते १६०० रूपये आहे. वांग्याचे तोडे आठवड्यातून दोन ते तीन वेळा केले जातात. पुढचे एक ते दोन महिने अजून तोडे सुरू राहणार आहेत. त्यामुळे कमीत कमी दर धरला तरी खर्च वजा आता तीन ते साडेतीन लाख रुपये मिळू शकतात.
सध्या शेतीला वाईट दिवस आले असल्याने दुहेरी पीक लावले . उत्पादन चांगले निघत असल्याने दर परवडत आहे. महागाईच्या तुलनेत दर कमीच आहेत. स्वतः कष्ट असल्याने आणि उत्पादन खर्च कमी केल्याने खर्च वजा करता तीन ते साडेतीन लाख रुपये मिळतील अशी अपेक्षा आहे असे लव्हु मिसाळ यांनी सांगितले. मिसाळ यांनी हा वांग्याचा प्लाँट संपतो ना संपतो तोच दुसऱ्या प्लाँटमध्ये वांग्याची लागण केली आहे. शेतकऱ्यांनी एकाच पिकावर अवलंबून न राहता आधुनिक तंत्राचा वापर करत अंतर्गत पिकांवर भर दिल्यास शेतीतून आर्थिक प्रगती साधता येईल , असेही त्यांनी सांगितले.
चौकट
अंतर्गत पिकाचा फायदा
सध्या शेतीपिकाला बाजारभाव मिळताना अनेक अडचणींचा सामना करावा लागतो. त्या पार्श्वभूमीवर एका पिकाला बाजारपेठेत चांगला दर मिळाला नाही तर दुसऱ्या पिकाला दर मिळेल या अपेक्षेने काही शेतकरी अंतर्गत पिके घेत असतात. त्यामुळे अंतर्गत पिके फायद्याचे ठरत असल्याचे दिसून येत आहे. मी स्वतः वांग्याच्या पिकात मिरचीचे अंतर्गत पिक घेतले आहे. त्यातून चांगले उत्पादन मिळाले असून सध्या तरी चांगला दर मिळाला आहे. अजूनही वांगी पिकांचे पिक घेतले असून त्यातही मिरची पिकांची लागण केली आहे.
- लव्हु मिसाळ , शेतकरी
वरकुटे - मलवडी , ता. माण
