मनोज घोरपडे यांना अखेर जामीन मंजूर
मायणी :- प्रतिनिधी
येथील साखर कारखान्यातील कामगाराच्या खूनप्रकरणी संशयित म्हणून अटकेत असलेले खटाव माण साखरकारखाण्याचे को – चेअरमन मनोज घोरपडे यांना वर्षभरानंतर उच्च न्यायालयाने सोमवारी सशर्त जामीन मंजूर केला . मनोज घोरपडे यांना जामीन मिळाल्याचे वृत्त समजताच कराड उत्तर मध्ये त्यांच्या समर्थकांनी जल्लोष केला .
एक वर्षापूर्वी ११ मार्च २०२१ रोजी पडळ येथील केएम शुगर्स प्रायव्हेट लिमिटेड या कारखान्यातील एका कामगाराचा मारहाणीनंतर उपचारादरम्यान मृत्यू झाला होता . याप्रकरणी कारखान्याचे चेअरमन प्रभाकर घार्गे , को चेअरमन मनोज घोरपडे यांच्यासह काही जणांना अटक झाली होती . गेल्या वर्षभरात मनोज घोरपडे यांनी जामिनासाठी जिल्हा सत्र न्यायालयात प्रयत्न केले होते . मात्र , त्यांना सत्र न्यायालयात अपयश आले .
त्यांनतर उच्च न्यायालयाने त्यांना जामीन मंजूर केला . जामीन मंजूर करण्यात आल्याची माहिती कारखान्यात कार्यकारी संचालक व त्यांचे बंधु संग्राम घोरपडे यांनी दिली . मनोज घोरपडे यांना जामीन मिळाल्याचे वृत्त समजताच कराड उत्तर व जिल्ह्यातील त्यांच्या समर्थकांनी जल्लोष केला .
त्यांची अटक होण्यात आणि जामीन न मिळण्यातही राजकारण होत असल्याच्या चर्चांना उत आला होता . आता घोरपडे यांना जामीन मिळाल्याने कराड उत्तर मध्ये तसेच जिल्ह्याच्या राजकारणात मोठी उलथापलथ होण्याची शक्यता आहे .
घोरपडे अटकेने आणि जामीन मिळण्यात होणाऱ्या विलंबामुळे सुखावलेल्यांना आगामी काळात राजकीय पटलावर धक्के मिळणार असल्याचीही चर्चा जिल्ह्यात सुरु झाली आहे . उच्च न्यायालसाठी आरोपीचे वकील म्हणून अशोक मुंडर्गी व दिलीप बोडके यांनी काम पाहिले .
